jueves, 19 de diciembre de 2013

ESTE NADAL, AGASALLA DEMO EDITORIAL!!

Queremos aproveitar para dar as grazas a todos os que estades pasando estes días a apoiar esta experiencia. Estamos gratamente sorprendidos de xente que está vindo doutras localidades con Compostela, Lugo, Pontedeume, etc.

TENDA LIMITADA, PRODUTOS LIMITADOS.
Na nosa tenda efémera, temos unha morea de material en edicións limitadas do Planeta Mincha e packs especiais para agasallos con produtos exclusivos do Planeta Mincha e tamén de "Vento e chuvia. Mitoloxía da Antiga Gallaecia". Ademáis do noso catálogo editorial e outros produtos exclusivos e diferentes.
Desde cadros orixinais, ata series de láminas, artesanía, chapas, xoguetes recortables, figuriñas e máis.

AGASALLOS PERSONALIZADOS
Ata o peche anunciado da nosa tenda, o día 5 de xaneiro, podedes levar as obras de Manel Cráneo asinadas e customizadas para adicarlle a quen querades nestas festas.
Teremos tamén exemplares de "Vento e Chuvia. Mitoloxía da Antiga Gallaecia", asinados tamén polo escritor Manuel Gago.

O DETALLIÑO
Con todas as compras de nadal e reis imos a agasallar marcadores de lectura, posachupiños e un poster.
Desde hoxe, día 19, e ata fin de existencias.

Esperámosvos!!

Tenda Demo/Consulado Planeta Mincha  Foto: Fran Moledo


lunes, 16 de diciembre de 2013

DEMOSTRACIÓNS GRÁFICAS: ENTREVISTA A FRAN BUENO CAPEÁNS

O VINDEIRO SÁBADO 21 DE DECEMBRO REMATA O NOSO CICLO COA MASTERCLASS DE FRAN BUENO.
Aínda dispoñemos de prazas libres para a clase maestra dun dos autores galegos con máis proxección internacional dentro do mercado da banda deseñada. Completamos deste xeito o ciclo que exitosamente comezamos o pasado sábado có autor de pin-ups Pinturero entrando desta volta no mundo da narrativa nun medio tan complexo coma pode ser o cómic. Esperámosvos nesta oportunidade especial de ampliar coñecementos cunha das nosas grandes figuras.

Podedes consultar a súa biografía e bibliografñia aquí: www.franbueno.com/bio/



—En que ano comezaches a exercer profesionalmente, e como cambiou para ti o teu sistema de traballo técnico desde entón?
—Empecei no 93, pouco despois de rematar Belas Artes. O cambio máis importante, evidentemente, foi a aparición do ordenador, e con el a de internet. O ordenador non mellora o teu traballo, pero dáche máis opcións e comodidade. Internet facilitounos as entregas e o formato dixital permitiu que non tivésemos que preocuparnos pola devolución dos orixinais, cousa que antes era un problema maior.

—No que respecta ás condicións laborais, cal é o mellor mercado ou especialidade da ilustración no que tes traballado?
—Mercado, o francés. Medio, o diario El País, que estivo (só foi unha vez, por desgraza) magnificamente pagado.

—Que é o que máis che molesta profesionalmente que che diga un cliente?
—O máis molesto é cando alguén que descoñece por completo o noso medio pretende facerche encargos como quen che fai favores.



—Que esperas das novas xeracións de autores, e cal é a primeira mensaxe que lle transmitirías a un autor que está comezando?
—Espéroo todo. Estou convencido de que van ser marabillosos, porque se hai algo para min incuestionable é que a creatividade xamais está en crise. A xente con talento, con ganas de traballar e de comer o mundo aparece todos os anos, incluso os bisestos.
Mensaxe para autor incipiente? Estamos no mesmo barco. Eu creo que vou ser incipiente polo menos ata os 80. De todos os xeitos, compañeiro/a, isto é o que penso: se é o que queres e o que che gusta, valora o teu traballo, traballa sempre e non te desanimes nunca.

—Cal é o traballo que che encantaría facer e aínda non fixeches? (tanto se é de encargo coma un proxecto propio).
—Creo que, por encargo, debuxar Superman. Como proxecto propio, sempre o próximo, claro.



—Como está afectando a crise ao sector gráfico, e que medidas cres que se deberían tomar desde o colectivo profesional?
—Realmente non sei se a crise está afectando ao noso sector; desde logo, non é o meu caso. Colectivamente penso que debemos facernos visibles como profesionais serios e necesarios, ao mesmo tempo que facemos presión e educamos para evitar abusos.

—Existe a intrusión laboral ou crees que calquera é libre de facer o que poida para gañar a vida nos tempos que corren?
—Creo que existen casos particulares, e de cada un debemos opinar con coñecemento de causa. En calquera caso, non estou a favor do capitalismo salvaxe; antes ben, dunha regulación solidaria e unha ética (profesional e persoal) que inclúe non enganar a ninguén nin provocar ou aproveitarse de situacións que poidan prexudicar a terceiros.

—Cales son as túas novas metas como autor?
—Como di Buzz Lightyear, «ata o infinito e máis alá». Teño algúns proxectos en carteira, pero prefiro non falar deles ata que estean máis avanzados (agora poño o maimiño na comisura do beizo e fago: hi, hi, hi...). E cando chegue aos 80, quero debuxar como Franquin, Uderzo, Moebius, Steve Rude, Adam Hughes, Mike Mignola, Darwin Cooke, Milt Kalh, Blutch, Alberto Breccia, José Muñoz, Hugo Pratt, Jon Klassen, Paul Felix, Sean Phillips e Sean Murphy todos xuntos, pero mellor.

—Algunha ferramenta técnica que non exista pero ti xa teñas en mente?
—Un trebello que teña aspecto e peso de caderno pero que funcione como un ordenador e unha Cintiq á vez. Tamaños A3, A4 e A5. 1000, 700 e 400 euros respectivamente. Creo que xa lle falta pouco, aínda que se cadra para os prezos algo máis.


—Es o gañador da última edición do Premio Castelao de BD que convoca a Deputación da Coruña. Pero antes houbo moitas outras mencións nos anos que levas traballando. Que opinión che merecen os premios e como están organizados?

—Os premios Castelao teñen algo moi positivo, que é o compromiso de publicación. Aínda así hai moitas cousas mellorables —e que forman parte da idiosincrasia do noso país, me temo— que non quero resaltar aquí por non aburrir nin gastar tinta de máis, que hai moita crise. En canto aos premios de cómic en xeral sufro un pouco co agravio comparativo. Gran cantidade de premios de igual ou menor repercusión en disciplinas como a pintura, a fotografía ou a novela están moitísimo mellor dotados economicamente. O que se chama o quid do premio, oes!

miércoles, 11 de diciembre de 2013

APERTURA TENDA DEMO EDITORIAL/CONSULADO PLANETA MINCHA


Temos o pracer de anunciar xa con detalle á apertura da tenda Demo Editorial e Consulado do Planeta Mincha.

O acto celebrarase o vindeiro VENRES 13 ás 20:00 h —nin antes nin despois— na rúa Gramela, 23 baixo (15010 A Coruña). Contaremos coa presenza do director da editorial e Cónsul do Planeta Mincha, Manel Cráneo, e dalgún outro delegado abducido polo Ministerio de Ciencia de dito planeta.

Para a ocasión haberá con numerosas ofertas de souvenirs da cultura mincha e, naturalmente, o catálogo completo de banda deseñada de autores galegos de Demo Editorial.

No noso espazo atoparás produtos nunha ampla gama de prezos, desde 0,50 ata 750 euros. Por exemplo, pezas orixinais, arte e artesanía mincha, xoguetes de papel, series limitadas de láminas, coleccións de adhesivos, pezas en volume en diferentes formatos e técnicas, series de chapas, figuriñas e unha morea de produtos que farán as ledicias dos padais máis exquisitos durante este Nadal.

Os produtos estrela do Planeta Mincha PACK LüMINNIK e PACK CARTöNNÍK serán presentados en exclusiva no acto e terán tamén unha edición limitada.

O acto de interrelación entre ambas culturas contará coa participación de varios e recoñecidos músicos coruñeses como Fernando Esclusa, Fran Castro, José Bonham e Luís Tinaquero. Servirase un viño tinto da rexión de Vërdia aos asistentes e algunha tortilla de ovos de popöllo do norte de Longölia. 

SOBRE A TENDA DEMO-CONSULADO PLANETA MINCHA
Un proxecto sen precedentes
Unha das particularidades deste proxecto é que atenta directamente contra o sistema comercial establecido O seu director e cónsul anunciará a data exacta de clausura no propio acto de apertura. O propio negocio é unha chamada de atención para reivindicar novas fórmulas e alternativas para os mercados culturais.

Series limitadas para días limitados
Durante o espazo de tempo que a tenda-consulado permaneza aberta, será tamén un espazo multidisciplinar; imos desenvolver diferentes actividades de dinamización da cultura e animación á lectura, tanto para público xeral e para profesionais.

Dentro dese contexto enmarcamos dúas clases maxistrais con dous grandes autores, Pinturero (Madrid) e Fran Bueno (Compostela), dentro do ciclo DEMOstracións Gráficas (preme no título para consultar o programa). Para a primeira sesión, que decorrerá este sábado, 14 de decembro, quedan prazas contadas.

Proximamente anunciaremos novas actividades.

Esperamos contar coa túa presenza e que veñas con cartos no peto se queres marchar feliz, porque co viño non che vai chegar.

DEMO EDITORIAL / CONSULADO PLANETA MINCHA XöP

A Coruña, 11 de decembro de 2013

jueves, 5 de diciembre de 2013

DEMOSTRACIÓNS GRÁFICAS: ENTREVISTA A JAVIER FERNÁNDEZ CARRERA "PINTUREIRO"


Publicamos esta breve entrevista ao autor que terá o pracer de inaugurar o noso ciclo de Masterclass que lanzamos baixo o título de "DEMOSTRACIÓNS GRÁFICAS" o vindeiro 14 de decembro,
dentro das actividades que Demo programará na súa nova tenda efémera.
Aínda temos aberto o prazo de inscripción para asistir a unha clase de xornada completa (xantar incluído) onde con Pintureiro, profundizaremos no mundo da ilustración dixital avanzada.
Podedes infoirmarvos en: demo.editorial@gmail.com

O autor madrileño e afincado en A Coruña, viu publicado o seu álbum de pin-ups, "Rapazas" demostrando ser un dos grandes especialistas españoles neste campo profesional. Ademáis ten traballado para as mellores empresas de publicidade e editoras estatais; realizando story-boards, cartelísmo ou libros de texto entre outros.


—En que ano comezaches a exercer profesionalmente, e como cambiou para ti o teu sistema de traballo técnico desde entón?
—En 2001, hai doce anos. Desde entón, os avances tecnolóxicos téñenme facilitado moito o traballo. Cambiei o taboleiro de debuxo pola Cintiq, e, grazas a internet, acabouse buscar a documentación en revistas e enciclopedias, ou enviar cedés co traballo escaneado por mensaxería.

—No que respecta ás condicións laborais, cal é o mellor mercado ou especialidade da ilustración no que tes traballado?
—O mercado máis rendible, para min, é o da publicidade (aínda que tamén é o máis esixente). Por outro lado, hai editoriais que compensan os pagamentos menos cuantiosos cunha maior flexibilidade no referido ás datas de entrega.

—Que é o que máis che molesta profesionalmente que che diga un cliente?
—Que se vai atrasar no pagamento.

—Que esperas das novas xeracións de autores, e cal é a primeira mensaxe que lle transmitirías a un autor que está comezando?
—As novas xeracións de autores están moi ben preparadas no aspecto técnico. Espero delas que saiban valorarse a si mesmas á hora de negociar coas empresas de publicidade, editoriais, etc. Dáse a circunstancia de que, ao comezar a súa carreira, hai quen pensa que non debería cobrar tanto como un ilustrador máis veterano, cando o traballo que vai realizar é o mesmo. Pódese facer mellor ou peor, máis rápido ou máis lento, pero non máis barato. Gratis (ou a cambio de promoción), nunca. O meu consello sería que buscasen darse visibilidade tamén no estranxeiro. No noso caso, pódese emigrar «on-line», sen saír da casa.

—Cal é o traballo que che encantaría facer e aínda non fixeches? (tanto se é de encargo coma un proxecto propio).
—Deseñar unha pin-up para a súa modelaxe, sexa en 3D ou como figuriña esculpida.



—Como está afectando a crise ao sector gráfico, e que medidas cres que se deberían tomar desde o colectivo profesional?
—Reducíronse tanto a cantidade de traballo como as tarifas, que xa levaban anos estancadas. Aínda que as distintas asociacións profesionais se fan eco da problemática do noso sector (http://observatoriodelailustracion.org/about/), evitar que a precariedade se perpetúe é unha tarefa individual; debemos ter presentes os prezos pre-crise, para cando esta pase.

—Existe a intrusión laboral ou crees que calquera é libre de facer o que poida para gañar a vida nos tempos que corren?

—Ambas as dúas cousas. En todos os traballos existe a figura do «familiar/amigo/veciño que cho fai máis barato», e, desde logo, teñen dereito a gañar a vida como boamente poidan. Non gusto do termo intruso, aplicado a unha actividade artística.

—Cales son as túas novas metas como autor?
—Agora estou enfocándome máis cara á ilustración de fantasía e ciencia ficción.

—Algunha ferramenta técnica que non exista pero ti xa teñas en mente?

—Non sabería dicirche… Un afialapis láser?

Preme abaixo se queres velo programa:

PROGRAMACIÓN E TEMARIO DE "DEMOSTRACIÓNS GRÁFICAS"

lunes, 2 de diciembre de 2013

DEMOSTRACIÓNS GRÁFICAS (Primeira Edición)

Ola a todos/as, anunciamos a primeira edición dos nosos ciclos de Masterclass que levaremos a cabo no aula de Demo editorial en A Coruña. Para inscripcións ou calquera consulta podedes poñervos en contacto no noso habitual enderezo de correo: demo.editorial@gmail.com.





viernes, 22 de noviembre de 2013

DEMO EDITORIAL E PLANETA MINCHA ABRIRÁN UNHA TENDA SEN PRECEDENTES

SERÁ UN PROXECTO SEN PRECEDENTES, UN NOVO CONCEPTO DE NEGOCIO, A PRIMEIRA TENDA EFÉMERA. 
Así o declara o cónsul do Planeta Mincha e director de Demo, Manel Cráneo.


O vindeiro venres 13 de decembro abrirá a tenda oficial de DEMO EDITORIAL en A Coruña. Pero iso non é todo, Demo asinou unha alianza có Ministerio de Ciencia do Planeta Mincha para compartir esta tenda có consulado de dito planeta na Terra. O consulado venderá souvenirs do seu planeta nun intento de facer promoción cultural e turística do mesmo. Existe vida extraterrestre? Xa tedes a resposta.

UNHA MORTE ANUNCIADA
Segundo conta Cráneo: "DEMO EDITORIAL e PLANETA MINCHA CONSULADO XÖP, non vai ser unha tenda ao uso. En principio a idea non é adaptarse ao sistema comercial senón máis ben adaptarse ás propias necesidades do noso proxecto e filosofía de vida, algo que nace nuns tempos onde o sistema capitalista e comercial está demostrando ser un gran fiasco e polo tanto un gran fracaso."
Por esta razón, o Cónsul do Planeta Mincha e director de Demo Editorial, anunciará a data de clausura da tenda o mesmo día da súa inauguración. Todo isto dentro dunha extratexia extraterrestre que nace como alternativa ao típico negocio terrestre de toda a vida. 
"Non queremos morrer con isto, temos moitos proxectos máis en marcha. Esta tenda imos matala nós mesmos antes de que a destrúa o sistema", puntualiza Cráneo; "En calquera caso somos quen de matar e resucitalo noso propio proxecto as veces que estimemos oportuno."

REFERENZAS DA TENDA
Na tenda haberá produtos propios da editorial e do Planeta Mincha, e en moitos casos exclusivos, xa que o público atopará pezas únicas que non están á venta en ningunha outra parte do globo terráqueo. 
Os clientes que se acheguen poderán levarse a casa, ademáis de publicacións, pezas de arte ou artesanía do Planeta Mincha, cadros, figuras en volume, peluches, chapas, láminas e en xeral autoprodución da empresa Demo e da marca Planeta Mincha. 

DINAMIZACIÓN DO ESPAZO OU GALAXIA
Será un espazo divertido, diferente e innovador. Un proxecto onde durante o seu tempo de apertura haberá momentos tanto para o disfrute dos propios clientes como do sector profesional.
En breve, faráse unha programación onde haberá lugar para presentacións, tertulias, obradoiros, encontros con lectores ou masterclass con ilustradores profesionais da banda deseñada e a ilustración.

Estade atentos. Nos vindeiros días chegará nova información sobre este particular proxecto.


martes, 12 de noviembre de 2013

PRESENTACIÓN Y EXPO "A TORRE DOS MOUROS" EN BIBLOS (BETANZOS)


O proxecto "A torre dos Mouros" continúa a súa andadura despoís de máis dun ano en funcionamiento. Este venres a libraría, e centro de cultura, BIBLOS, en Betanzos, acollerá a mostra e presentación desta bd que recolle os resultados dun proxecto arqueolóxico distinto no seu tratamiento e contidos. No acto contaremos có director arqueolóxico da excavación, Antón Malde, có responsable de comunicación do proxectro, Manuel Gago, e có autor e editor da bd Manel Cráneo.

Aproveitando a presenza de Gago e Cráneo, presentarase tamén o libro "Vento e Chuvia. Mitoloxía da antiga Gallaecia", escrito polo primeiro e ilustrado polo segundo. Unha obra de alto interese e excelente acollida que se venderá en exclusiva este venres en Biblos e será distribuída no resto de librarías galegas a partir do vindeiro día 18 de novembro.

Xa sabedes, este venres non faltedes a esta doble presentación con exposición incluída. Será un pracer contar con vós.

miércoles, 23 de octubre de 2013

VOLTA "A FRAGA MILMAÑAS" DA MAN DE DEMO EDITORIAL

Demo Editorial publicará a finais de decembro "A FRAGA MILMAÑAS" con guións de Carlos Amil e deseños de Manel Cráneo. O album comprende unha selección de historietas curtas de entre unha e dúas páxinas, que foron publicadas en "Golfiño" durante as dúas épocas que a revista se mantivo no mercado. Primeiro da man de Edicións Xerais (1999-2000) e logo como suplemento dominical do diario La Voz de Galicia (2002-2004).
A Fraga Milamañas é unha serie que foi moi ben valorada no seu momento polo bo manexo da matelinguaxe do cómic que fan amosan nas súas páxinas os seus autores. Os personaxes principais, Fonsa a raposa e o lobo Ferocio,  artellan en cada historia desta serie, as súas artimañas para sobrevivir nunha fraga onde calquera cousa é posible.
Con este lanzamiento, Demo Editorial, pretende achegarse ao público infantil recuperando esta serie que tamén fara as ledicias dos pais, especialmente os da nova xeración que tiveron a oportunidade de leela serie no seu momento.



lunes, 21 de octubre de 2013

PRESENTACIÓN DE "OPERARIO" EN BANDA DESEÑADA (VIGO)


O vindeiro venres, Jano asinará exemplares en BANDA DESEÑADA en Vigo a partir das 18:30h. Para esta ocasión, agasallaremos cunha lámina a cada lector que se leve o álbum.
NON FALTEDES!

viernes, 11 de octubre de 2013

"OPERARIO" DE JANO, ATERRIZA EN SANTIAGO O VENRES 18 DE OUTUBRO

"Operario", do veterano autor Jano, inicia con esta actividade o seu tour de presentacións para o que xa temos fixadas máis datas  nas seguintes semanas.
Repartiremos 2 posavasos de "Operario", tamaño chupito a cada asistente e contaremos coa presenza de Jano asinando exemplares. Poderedes estrear alí o posavsos degustando un licor café.
Non deixedes de ler esta obra que supón un frio retrato da sociedade humana e o sistema social.
Unha sinxela, e nada pretenciosa, bd muda que te deixará sen palabras!!



martes, 17 de septiembre de 2013

ESCAPADA AO PLANETA MINCHA


"Escapada ao Planeta Mincha de Manel Cráneo" é unha expo que só poderedes ver durante esta semán na Fundación Luís Seoane, dentro das actividades do Freakemacine A Coruña. WARNING! o lampönak é moi perigoso, non vós acheguedes moito se pasedes a por alí! 
Máis info no blog do autor.

sábado, 3 de agosto de 2013

ACTIVIDADES DEMO EDITORIAL NO VIÑETAS DESDE O ATLÁNTICO 2013

Anunciamos o noso calendario de actividades para este VIÑETAS 2013, que celebraremos no noso stand e na carpa da Rúa da BD. Entre elas, a presentación en exclusiva en A Coruña dos nosos últimos títulos para o que contaremos coa presenza de tódolos autores. Esperámosvos do 1 ao 11 de agosto, con todo o catálogo de Demo Editorial e a marca Planeta Mincha, de Manel Cráneo, no stand nº 13 da Rúa da BD.



E con calquera compra, 1 marcapáxinas a elexir e un cartel A/2 de "A torre dos Mouros" GRATIS!! 

Nos próximos días anunciaremos algunha sorpresa máis!! :-)


PRESENTACIÓNS NA CARPA DA RÚA DA BD

XÓVES, 8 DE AGOSTO, ÁS 13:00H.
“CASTELAO 3. MÁIS ALÁ!” 
DE IVÁN SUÁREZ E INACIO VILARIÑO

VENRES, 9 DE AGOSTO ÁS 13:00H.
“OS DÍAS DO COMETA” 
"O FILLO DA FURIA"(2ªEDICIÓN)
DE MIGUEL FERNÁNDEZ E MANUEL L. POY 

SÁBADO, 10 DE AGOSTO ÁS 13:00H.
“OPERARIO” DE JANO

SESIÓNS DE SINATURAS NO STAND DEMO EDITORIAL

MÉRCORES, 10 DE AGOSTO 
19:00H. MANEL CRÁNEO

XÓVES, 8 DE AGOSTO
 19:00H. IVÁN SUÁREZ E INACIO VILARIÑO
21:00H. JANO

VENRES, 9 DE AGOSTO 
19:00H. MIGUEL FERNÁNDEZ E MANUEL L. POY 
21:00H. JANO

SÁBADO, 10 DE AGOSTO 
19:00H. JANO

viernes, 12 de julio de 2013

DEMO NO 16º SALÓN DO CÓMIC E A ILUSTRACIÓN DE CANGAS

Fantástico cartel do noso amigo José Domingo para o "Salón do Cómic e a Ilustración de Cangas" deste ano, no que estaremos presentes con stand da nosa editorial e cunha expo de Planeta Mincha de Manel Cráneo, que xunto a David Lafuente e Marina Seoane será un dos convidados oficiais. Esperámosvos!


jueves, 27 de junio de 2013

DEMO EDITORIAL ESTARÁ EN HOBBYCON E NO SALÓN DE CÓMIC DE CANGAS

MANEL CRÁNEO ESTARÁ PRESENTE EN AMBAS CITAS CON "PLANETA MINCHA"


Os lectores e amigos de Demo Editorial, tedes dúas citas este mes de xullo.

HOBBYCON (4 a 7 de xullo en Palexco, A Coruña)
A nosa editorial terá presenza na primeira edición do HOBBYCON, nova cita na cidade de A Coruña que promete convertirse na primeira experiencia de multisalón en España. O evento fusionará 4 tipos de feira: Cómic, Manga, Ciencia ficción e videoxogos. Para esta cita sen precedentes preparamos as seguintes actividades en colaboración con Hobbycon:

- Stand de demo Editorial e da nosa marca "Planeta Mincha", de Manel Cráneo. Onde poderedes adquirir publicacións de Demo Editorial e tamén de Planeta Mincha e o seu particular "minchandising".

- Presentaremos a nosa colección de ciencia ficción HäinöS de bd de ciencia ficción e mundos fantásticos.

- Exposición de orixinais de "Sálpock 1. O Val dos Cegos" de Álvaro López e Luís Sendón.
21 pezas de making off da obra.

- Partida de rol en directo, baseada no cómic "Sálpock, o Val dos Cegos" dirixida polo master Álvaro López.

- Sesións de sinaturas con algúns dos nosos autores no noso stand e outras sorpresas que iremos anunciando nos vineiros días.

Ademáis, estade atentos ao noso facebook, faremos sorteo de entradas desde hoxe mesmo!!

SALÓN DE CÓMIC DE CANGAS (22 a 28 de xullo, Cangas do Morrazo)
Outra cita indispensable da BD na que participaremos do seguinte xeito:

- Stand de venta da editorial durante toda a semán.

- Exposición de "Planeta Mincha Tour" de Manel Cráneo, convidado oficial nesta edición. A súa mostra acollerá unha escolma de 30 obras. Ilustracións da serie "Diario de Pichük, editada por Everest, da serie de bd "Planeta Mincha Estudos Xeográficos, e outras pranchas e traballos inéditos encaixados dentro do seu universo particular "Planeta Mincha", do que en breve veremos cousas publicadas en Demo Editorial.

Ademáis o autor participará xunto a Marina Seoane e Horacio Altuna nunha mesa redonda sobre cómic e ilustración.

Esperámosvos nestas dúas citas e en breve anunciaremos máis actividades para este verán xa que é inminente tamén unha nova edición de Viñetas desde o Atlántico, na que intentaremos estar un ano máis con stand propio.

martes, 18 de junio de 2013

"OPERARIO", DE JANO


Anunciamos oficialmente o lanzamento de "Operario", a nova obra de Jano. Unha historia sinxela e directa na que se narra a historia dun día calquera na vida dun operario de máquinas durante unha era industrial de entorno atemporal. Un album de temática social que reflicte dalgún xeito as diferenzas que marcan o panorama laboral do século XIX, do XX ou do XXI.
Comedia, aventura e drama social son a mestura ideal para esta historia muda que abrirá a nosa nova colección Demográfica, destinada a libros de pequeno formato onde as imaxes pesarán por riba das palabras. O album estará á venta o 1 de agosto e será presentado na próxima edición do Viñetas, en A Coruña, a semán do 5 ao 11.

Sobre o autor
Jano é un habitual da escena da BD galega, a súa primeira obra profesional de cómic foi "Nieve Negra" (1999-2000), desde entón ten colaborado en diversas publicacións de todo o Estado ("Buen Provecho", "Tos", "BD Banda") e en varias exposicións colectivas. Cofundou e participou no colectivo Polaqia (2001-2002) con dúas historias na colectánea "Mmmh!!" e co título propio "Patricia". Colaborou na obra colectiva "Tapa Roja" (Sinsentido, 2004) e participa en diversos fanzines ("Fanzine Enfermo", "Carne Líquida"), logo chegaron os albumes "Layka" (Cabezabajo Ediciones, 2005), "Centoloman" (Rei Zintolo, 2009), Ratoon (Bang Ediciones, 2010) e 3x1 (Polaquia, 2012).

miércoles, 12 de junio de 2013

PRESENTACIÓN DE "CASTELAO 3. MÁIS ALÁ!" EN LALÍN

O vindeiro venres 14 de Xuño, ás 8 da tarde, a libraría VAGALUME, en Lalín, acollerá a Inacio e a Iván Suárez. para presentar o terceiro volume da Colección Castelao recentemente saído ao mercado. levate o teu Castelao customizado a casa e disfruta da festa. Haberá de beber e de picar para tódolos asistentes! Non faltes!


viernes, 10 de mayo de 2013

CASTELAO. MÁIS ALÁ!


O Día das Letras Galegas chega a terceira entrega da Colección Castelao ás librarías. Adiantamos información sobre o lanzamento que vai a arrasar con todo nas librarías galegas. 


CASTELAO. MÁIS ALÁ!
Inacio • Iván Suárez
17x24 con lapelas de 7 cm
64 páxinas, Branco e negro
PVP 12 euros

ISBN: 978-84-940349-5-4 
Depósito legal: C 751-2013

A serie Castelao, á que pertencen con este os volumes O pobre tolo e Titoán, ofrece un excepcional achegamento á vida de Afonso Daniel Rodríguez Castelao (Rianxo, 1886 – Bos Aires, 1950). Unha aproximación máis humana que simbólica, mítica ou académica, baseada no rigor histórico e na riqueza contextual, que non esquece a pulsión onírica e humorística presente de forma clara no seu legado. 
Máis alá!, o terceiro dos libros que compoñen o ambicioso proxecto de Inacio no guión e Iván Suárez no debuxo, lévanos ás lembranzas de Castelao sobre a súa viaxe europea de 1921, coas súas continúas visitas aos museos, e os seus encontros co filósofo Bergson, o pintor Corredoira e o músico Manuel Quiroga, entre outros, que permiten entender algúns dos seus posicionamentos éticos e estéticos.
O segundo volume desta serie, Titoán, obtivo precisamente o Premio Castelao de Banda Deseñada 2011, outorgado pola Deputación da Coruña. 

PRESENTACIÓN PREVIA EN KOMIC LIBRERÍA
Un día antes da saída oficial celebraremos este lanzamento en Komic Librería, os nosos compañeiros de viaxe nesta aventura de colección. Para o acto contaremos coa presenza dos autores e o fantástico sorteo dunha páxina orixinal da bd. Esperamos que vós acheguedes e o disfrutedes.



miércoles, 8 de mayo de 2013

XA CHEGA!! CASTELAO III. MÁIS ALÁ!

O vindeiro 17 de maio, Día das Letras Galegas, se distribuirá en toda Galicia a terceira entrega da Serie Castelao, na que os autores Inacio e Iván Suárez abordan en formato banda deseñada a biografía do multifacético rianxeiro. O album editarase unha vez máis coa colaboración de Komic Libraría, compañeiros de viaxe nesta aventura de colección sen precedentes na BD galega.

A finais desta semán desvelaremos máis detalles sobre esta terceira entrega que nestes momentos xa está en proceso de impresión e que será presentada uns días antes da súa saída oficial ao mercado, na propia libraría Komic, en Santiago.



lunes, 6 de mayo de 2013

O CARRO DA MAFIA APARCARÁ EN LALÍN


Os autores Manolo L. Poy e Miguel Fernández, aparcarán o vindeiro venres 10 de maio en Lalín para dar unha charla aos alumnos do IES Ramón María Aller sobre a súa obra "Os días do cometa" e esa mesma tarde presentarán a novela gráfica na libraría Vagalume ás 19:00h cunha sesión de sinaturas onde Miguel Fernández promete debuxar aos asistentes os mellores coches utilizados nas fuxidas dos anos 80.



lunes, 29 de abril de 2013

O COMETA REGRESA EN MAIO!!

Nestes tempos sembrados de delincuencia a tódolos niveis, Manolo López Poy e Miguel Fernández teñen prevista una serie de atracos para as dúas primeiras semanas de maio. Preparade as carteiras e non deixedes de pasar por Libraría Paz (Pontevedra), Libraría Totem (Lugo) e Pub Cómic (Sarria). Se estades presentes nestes actos delictivos sairedes con 13,50 euros menos no voso peto, maís alomenos recibiredes a cambio unha historia negra 100% que retrata sen remilgos a corrupción na Galiza dos 80, asinada e customizada cun violento debuxo de puño e letra dos autores.
MANOS ARRIBA ISTO É UN AGASALLO!!


lunes, 22 de abril de 2013

A EXPOSICIÓN SOBRE "A TORRE DOS MOUROS" VISITA CAMBRE

Mañá, 23 de abril, Día Internacional do Libro, inaugúrase a exposición de making off da BD "A Torre dos Mouros" na Biblioteca Central de Cambre, onde permañecerá parte de maio. A mostra reune 25 pranchas de lápiz, tinta, reproduccións dixitais, story-boards, etc; que amosan parte do proceso de produción do comic-book realizado por Manel Cráneo co asesoramento do arqueólogo Antón Malde, director da excavación que se reflicte no cómic, e do xornalista e historiador Manuel Gago.
Esta obra editada por Demo amosa a vida e costumes da poboación de Lira-Carnota na Alta Idade Media, durante as invasións normandas nunha fortificación excavada o pasado verán grazas aos mencionados directores de proxecto e un gran grupo de voluntarios da zona, apoiados polo propio Concello de Carnota. A produción da banda deseñada contou con apoio da Xunta. Dita mostra terá lugar durante o programa Abril Ilustrado das Bibliotecas de Cambre, onde o propio autor impartirá varios obradoiros de iniciación ao cómic para escolares.

miércoles, 3 de abril de 2013

UN BANDIDO QUE XA NON MORRERÁ NO OLVIDO

"O FILLO DA FURIA", a obra coa que Manolo López Poy e Miguel Fernández rescataron a figura de Mamed Casanova, o derradeiro bandoleiro romántico, percorre de novo as librarías galegas coa súa segunda edición. Unha desas historias que reafirman que a realidade supera a ficción e que hai personaxes históricos condenados ao malditismo que son reacios a morrer esquecidos no olvido. Aínda non o leíches?

domingo, 17 de marzo de 2013

O COMETA HALLEY CRUZA DE NOVO GALICIA!!



Traémosvos un marzo negro, negro, negro. A nova novela gráfica de Manolo López Poy e Miguel Fernández, primeira bd sobre corrupción e drogas en Galicia, chega este mércores ás librarías.
Este venres 22 de marzo, primeira presentación oficial do album en Komic Librería de Santiago.
Lembramos que da man deste lanzamento, aparece tamén a segunda edición de "Mamed Casanova. O fillo da furia", un hit de Demo Editorial asinado polos mesmos autores. Se non o tedes aínda xa estades tardando. Disfrutadeos!


jueves, 7 de marzo de 2013

NOVIDADES DEMO EDITORIAL NAS LIBRARÍAS EN MARZO


‘OS DÍAS DO COMETA’ e ‘MAMED CASANOVA: O FILLO DA FURIA’ (2.ª edición),
de Manolo López Poy e Miguel Fernández


OS DÍAS DO COMETA
Manolo López Poy e Miguel Fernández
100 páxinas, branco e negro
Medidas: 17 × 24 cm
Encadernación rústica con lapelas de 12 cm
PVP: 13,50 euros
ISBN: 978-84-940349-4-7


MAMED CASANOVA: O FILLO DA FURIA  (2.ª edición)
Manolo López Poy e Miguel Fernández
104 páxinas, branco e negro
Medidas: 17 × 24 cm
Encadernación rústica con lapelas de 12 cm
PVP: 13,50 euros
ISBN: 978-84-936993-1-4



            Demo Editorial lanzará á venda o 20 de marzo Os días do cometa, nova novela gráfica do guionista e xornalista Manolo López Poy e o debuxante Miguel Fernández. Como xa fixeran na súa anterior obra, Mamed Casanova: O fillo da furia —cuxo éxito fai que chegue agora a súa segunda edición—, abordan o mundo do crime e a delincuencia en Galicia.
            Para esta ocasión, a acción sitúase no rural galego dos anos 80, onde catro amigos da infancia, con roles ben diferentes, conflúen nunha espiral de corrupción e narcotráfico que os levará a un final rotundo.
            O paso do cometa Halley é o pano de fondo para un sólido traballo de ambientación na década dos oitenta, que xera unha fría escenografía, nada nostálxica, nesta obra para adultos. Os días do cometa contén todos os elementos necesarios para construír unha auténtica crónica negra. Isto vén reforzado pola experiencia xornalística do seu guionista e o gusto polo xénero policial de ambos os autores.
            Por outra banda, é a primeira vez que na banda deseñada galega se abordan temas como a prostitución, o narcotráfico e a corrupción no rural galego de hai case tres décadas. Novamente, Manolo López Poy e Miguel Fernández constrúen unha obra valente, transgresora e dura que os reafirma como máximos expoñentes da BD de xénero negro en Galicia.

XIRA DE PRESENTACIÓNS
Demo Editorial está xa a coordinar unha xira de presentacións con sesións de sinaturas dos autores por diversas localidades galegas entre os meses de marzo e abril. A primeira cita será o venres 22 de marzo en Komic Librería (Santiago de Compostela) co libro quentiño e acabado de saír á venda.


OS AUTORES

Manolo López Poy. É de Sarria (Lugo); marchou a Madrid a estudar xornalismo, e alí exerceu durante moitos anos ese oficio. Despois viñeron xornais, radios e televisións en Andalucía, Galicia e Cataluña. Ultimamente traballa como periodista freelance para revistas de música, viaxes e motor. É director do documental La frontera de papel: cinco historias de nostalgia y esperanza. Publicou o libro Camino a la libertad: historia social del blues, codirixe o programa de radio Bad Music Blues. Dá conferencias sobre novela negra, cómic e cultura da discapacidade.

Miguel Fernández Vázquez. Nacido en Baralla (Lugo), estudou deseño gráfico na Escola de Artes Aplicadas Ramón Falcón, de Lugo, ademais de realización de audiovisuais na Escuela Superior de Imagen y Sonido CES (Madrid), e cinema de animación e debuxos animados na ECAM (Escuela de Cinematografía y del Audiovisual de la Comunidad de Madrid). Colaborou na realización da curtametraxe de animación en 2D Teatro mágico.Traballou para Animagic Studio nos filmes Los tres Reyes Magos, O Cid e Jester Till. No ano 2004 acadou o premio ao mellor cómic de xénero negro na sexta edición do Festival Internacional de Cinema Negre de Manresa (Fecinema), pola obra Yo no trabajo gratis.

Xuntos publicaron en 2010 a novela gráfica Mamed Casanova: O fillo da furia (Demo Editorial), que sería traducida a castelán o ano seguinte baixo o título de El hijo de la ira (Diábolo Ediciones/Demo Editorial). A obra recrea a biografía do bandoleiro homónimo, natural de Ortigueira, perseguido pola Garda Civil a primeiros do século XX e mitificado polas plumas de Emilia Pardo Bazán e Valle-Inclán, entre outros. Un antiheroe contra o sistema da súa época, que foi protagonista dos xornais e que acabou no esquecemento colectivo ata ser a súa figura rescatada nesta obra. Recentemente, os autores colaboraron tamén nunha BD curta de ciencia ficción para a revista de fantasía Cthulhu.

miércoles, 27 de febrero de 2013

VOLVE "MAMED CASANOVA: O FILLO DA FURIA"

Levabamos xa arredor dun ano coa primeira edición esgotada e agardando a ocasión para relanzalo. Mamed Casanova: O fillo da furia, é indudablemente un hit en Demo Editorial. A primeira novela gráfica de xénero negro ambientada en Galicia e que conta a historia do bandido Mamed Casanova, natural de Grañas de Sor (Ortigueira). Agora volta coa súa segunda edición para acompañar a saída da nova novela gráfica dos seus autores, o xornalista Manolo López Poy e o debuxante Miguel Fernández. A vindeira semán daremos información oficial e máis detallada sobre a súa nova obra Os días do cometa.


lunes, 11 de febrero de 2013

PRESENTACIÓN E EXPO DE ORIXINAIS DE "CASTELAO:TITOÁN" EN LALÍN


Proseguimos con novas actividades para este mes de febreiro. Esta vez tócalle o turno á obra "Titoán" de Inacio Vilariño e Iván Suárez. O venres 15 de febreiro, presentación do libro e inauguración da expo con orixinais da obra no Café de Mili en Lalín. Na presentación, debuxante e guinista, estarán acompañados por Gracia Santorum. Fárase tamén unha lectura dalgunha pasaxe da obra, instrumentada por Benxa Otero. Para finalizar haberá tamén sesión de sinaturas dos autores. Non perdades a ocasión de achegarvos a esta obra premiada e apreciada pola crítica.

A colección Castelao pretende abarcar os diferentes momentos da vida do comprometido polifacético galego. Polo de agora van dous títulos publicados e os autores xa están a traballar no terceiro, que verá á luz no presente ano 2013 e que editaremos novamente coa colaboración de Komic Librería.

sábado, 19 de enero de 2013

CANCELADA PRESENTACIÓN DESTA MAÑÁN EN METRÓPOLIS CÓMIC EN FERROL!!

Cancelamos por causa do forte temporal que nós impide coller a estrada. Xa temos nova data, será o venres 8 de febreiro ás 19.30h. Graciñas pola comprensión.

viernes, 11 de enero de 2013

MANEL CRÁNEO VISITARÁ KÓMIC E METRÓPOLIS


Comezamos o ano con novas presentacións. Doblete de Manel Cráneo o 18 e 19 de xaneiro nas librarías Komic de Santiago e Metrópolis de Ferrol. O autor asinará exemplares das súas últimas publicacións mentras ultima xa o seu próximo album "Destino Hërgüss", ambientado no seu universo particular Planeta Mincha e que verá a luz ao longo deste ano, con certo retraso sobre o previsto. A obra editarase dentro da nosa colección HäinöS de fantasía e ciencia ficción.

Pero a de Santiago e Ferrol non serán as súas únicas presentacións este mes, o sábado 26 de xaneiro voltará cunha charla sobre a "A Torre dos Mouros" na Fundación Wenceslao Fernández Flórez. Unha cita indispensable nun lugar máxico na que o autor estará acompañado por Manuel Gago e Antón Malde, responsables e directores do proxecto arqueolóxico no que está baseado o cómic.